دايما بنشوف الماضي مؤلم وبيوجعنا وفيه تأنيب للضمير وتأنيب لنفسنا.....المشكله اننا بنروح للماضي بروحنا وعقولنا ......انما أجسامنا مكانها في الحاضر والواقع اللي بقينا عايشين فيه خلاص...يا تري عارفين أن الرجوع للماضي بقي مستحيل وأنه مش هيرجع....... وان الدقيقه اللي بتعدي من حياتنا أصبحت ماضي؟..... ومش هتقدر ترجع كل لحظه حلوه عشتها في الماضي بحلاوتها وجمالها واحساسها....لازم اشوف مكاني بقي فين وأبطل ابص لنفسي نظره حسره واني صعبانه على نفسي.... وندم وقلق اني خايفه اخطي خطوه جديده ...وده بسبب اني مشدوده للماضي....
سمعت واحد غالي علي اوي اوي بيقولي "انا حاسس اني بعجز بسرعه وبقيت عيان"....وواحده برضه غاليه علي اوي اوي بتقولي "انا حاسه اني مريضه مرض مناعي ضرب في جسمي كله وان جسمي مليان جروح بتنزف ".....الحقيقه ان الشخصيتين عايشين على الماضي اللي حبوه بكل تفاصيله بحلوه ومره ومش قادرين يواجهوا الحاضر ورافضينه تماما ...الماضي اللي بنوا فيه أحلامهم وحياتهم.......بس عجزوا أنهم يكملوا الحياه اللي كانوا بيتمنوها ....
طيب مش دا كان اختيارك ؟ حتى ولو اتفرض عليك او اجبرت عليه؟ لكن استسلمت ليه ومكنتش شايف غير أن دا الطريق الوحيد.... ودوست على نفسك وعلى اللي حواليك وعندك مبرراتك.... يعني بمزاجك ....ورضاك ....بس اكيد لازم نعرف ان عند كل الناس حاجات حلوه في حياتهم تستاهل يكملوا الحياه علشانها .....واكيد لازم يبقى عندنا ايمان بربنا إن اللي جاي احلى...وان العقل يستقبل رساله مهمه منك انت شخصيا أن ربنا رحيم بعباده ....ومش هنفضل نعذب نفسنا طول الوقت بكل حاجه قديمه.... بالحاجات الوحشه اللي حصلت لينا وبالحاجات الحلوه اللي فقدناها وصعب ترجع وعايشبن عليها ....لازم تبقي رحيم على نفسك ويكون لك هدف تعيش يومك عشانه .....حتى ولو هدف صغير بسيط بس هتقدر تحققه....كل النجاحات اللي في حياتنا وراها ملفات جوانا بتحرك مشاعرنا علشان تعيد بناء تفكيرنا من جديد ......وحياتنا تتحرك...
"الم التجربه غير المعاناه من التجربه" الم التجربه الواقعه نفسها اللي وجعتني وتألمني وجرحتني ولكن المعاناه من التجربه وهو ما ينتج من تصرفاتك بعد التجربه ما إذا كان تأنيب أو تعذيب أو بكاء أو معاناه أو اي شيء..
لو كل واحد فينا فكر ولو لثواني أن اليوم اللي انت عايشه دلوقت هيبقى في يوم من الايام ماضي ....كان شال واحتفظ بالذكريات الحلوة علشان كل شويه يرجع يبص عليها وتديله طاقه ايجابيه أنه استمتع في يوم من الايام وأنه عاش تفاصيل ناس كتير اتحرموا منها ....اما الذكريات الوحشه أخدها دروس له في الحياه يتعلم منها أنه مبيرجعش ليها تاني...
"لولا الماضي لا كان الحاضر ولا المستقبل"