المعتقدات والمفاهيم

المعتقدات والمفاهيم اللي في حياتنا في منها جميل اوي وفي منها لازم يتغير ...اللي توارثناها من جيل لآخر .....عشان في منها مش صح و متأصله جوانا مهما مر بينا الوقت ..ومهما تطورنا وزادت درجه علمنا .....وللاسف اللي بيحصل إن مظاهرنا بس اللي بتتغير لكن بتفضل برضه مأثره علينا وفينا....

 

كلنا لما بنربي اولادنا ساعات بنعلمهم إن هدف البنت  الاساسي في الحياه ان يبقى ليها زوج و بيت وعيال وحتى التعليم ممكن تخلصه وهي  متجوزه...وانك لازم تبقى جميله وحلوه علشان تتجوزي وانك تبقى ست بيت كمان عشان تبقى مطلوبه اكتر ...وده مش وحش حاجه كويسه طبعا إن بناتنا يبقوا كده  ... بس نسمع بقى الجمل المعروفه  انتي حلوه مش هيلاقي زيك...هو يطول واحده زيك..دا انتي ست بيت ....الخ .....وده زي اللي بيتقال للولد بالظبط ....هي تلاقي زيك فين؟.... انت ابن ناس ...عندك شقه ومتعلم في جامعه غاليه ....وهكذا.....!!!!!! طيب لو متجوزوش هتبقى كارثه ليه ؟؟؟ وفلانه احسن منها او فلان احسن منه ليه؟؟؟ وهي الحقيقه النصيب .....

و زي ما تكون الصفات دي حاجات اضافيه ليها ثمن وان مش ده هو المفروض يبقى كده .....واني لما بعمل كده انا بديله قيمه زياده الناس المفروض تشيله فوق راسهم ..

متعلموش اني ابقى حلوه لنفسي الاول مش عشان اتجوز وبعد كده خلاص اهمل في نفسي  .......وان شخصيتي حلوه عشان اعيش في وسط الناس صح ... وابقى ست بيت انفع نفسي .....وان كياني عمره ما بيتقاس باللبس الغالي ولا الماركات ولا صيفت او شتيت فين واغير طريقه نطقي للكلام  عشان يتقال علي مميزه وعشان ابقى زي فلان وعلان ..وان المكان اللي اهلي اختاروه  اتعلم فيه مش عشان اتمنظر بيه ولكن عشان ادرس في مكان اعرف اقعد فيه وادرس كل حاجه نفسي اتعلمها ...

وتفضل كلمه اشمعنى جوانا او ليه مبقاش زيهم......زي ده وده .......هما احسن مني في ايه... نفس الجمل ونفس التفكير مهما الزمن اتغير ومر وبقينا ماشين مع التطور والسوشيال ميديا  وعاملين نفسنا زي بره بس للاسف صدقوني مفيش حاجه اتغيرت جوانا ... القشره بس هي اللي اتغيرت...القشره الغلط اللي احنا متمسكين بيها على الفاضي... اللبس وطريقه الكلام والمنظره وبس...

 

دا غير بقي اللي تقول  انا مستقله ومش عايزه اتجوز ومعايا مرتبي..وبخرج وباجي على كيفي وراحتي مفيش حد يضايقني... ويقولي رايحه فين وجايه منين.... ونفس الكلام هو يقول مش لاقي البنت اللي تفهمني وتكون مناسبه لقدراتي وتقدرني .....او ممكن يخليها تعمل اللي هي عايزاه علشان ميتقلش عليه راجعي ومتخلف...

 

التفكير او التغير لازم يجي من العقل ....وانك انسان كويس ازاي .....وبإيه... ..وان تعليمك وثقافتك ووعيك ومبادئك هما  الاهم واللي هيخلوك انسان كويس ....مش عندك ايه ...لازم تعرف ان اللي عندك مكمل للاساسيات اللي المفروض تبقى عليها ...... مفيش حاجه مكمله هي اللي بتعمل قيمه ليك ...عشان المكملات دي لو راحت هتبقى ولا حاجه.....انت فاهم غلط او انتي فاهمه غلط ...مثلا زي فلوسك او عربيتك او القصر اللي عايش فيه او لبسك او الجامعه او المدرسه اللي كنت فيها...كل ده لو راح وانت معندكش اساسيات صح هتبقى ولا حاجه... علشان كده مبقاش حد بيستحمل ولا عايز يضحي ولا عايز يتنازل ابدا..ولا قادر يكمل .....كل واحد عايز يفوز بكل حاجه ممكنه لانه للاسف شايف نفسه حاجه محصلتش وانه ميزه واضافه لاي حد ...وللاسف لو قيمت او قيمتي نفسك بس بصدق وبأمانه هتلاقي = صفر

 

علشان كده لما بننكسر بنبقى مش مصدقين اننا انكسرنا مصدومين .... وبنعيش للاسف فتره من الغيبوبه او إنكار للي حصل لينا ونفضل نتابع وجوانا كلمه.    " يمكن" كلمه الامل اللي كلنا بنجري وراها والكلمه دي مبتجيش للاسف علشان خلاص انكسر جوانا حاجات كتير صعب تخف او تتصلح ... والحقيقه انكشفت وظهرت قدام نفسك على حقيقتها ومش قادر تصدق الحقيقه او مش عايز ورافض تصدق....وخيبات الامل تزيد جواك .....

 

ولكن يمر الوقت من غير جديد ولا تحقيق للي انت عايزه ....ولكن كل اللي بيحصل ليس الا تاكيد للحقيقه اللي حصلت ليك او ليها ...... وتيجي مرحله البكاء على حالك واللي جوالك ودي نعمه كبيره اوي اوي....البكاء هي مرحله النقاهه  اللي المفروض تفوق فيها وتعرف مكانك فين وانت واقف فين ...وانك لازم تخف من جروحك وتفوق وتبدا تصلح...

 

لازم المعتقدات تبقى انك تتربي كويس علشان تعرف تصون وتحمي نفسك ومتستناش حد يحميك...لازم تتعلم كويس تعرف تحل مشاكلك بنفسك وتبقى قادر تواجه حياتك ومشاكلك وتاخد قرارات صح ...لازم تعرف مستواك الاجتماعي الحقيقي علشان تعيش على قدك ومتتظاهرش بغير الحقيقه ...عشان تبقى واضح وصريح ومش كداب ولا تتجمل بغير حقيقتك ...عشان منتفاجئش بحقيقه اللي عايشين معاهم بانهم اختلفوا ...وتقول مش هما دوول اللي اخترناهم ولا حبيناهم...هما الحقيقه متغيروش هي دي حقيقتهم وكانوا متجملين علشان المعتقدات القديمه اللي جواهم اللي فضلت راسخه جواهم .... المعتقدات اللي بتبقى بذره صغيره ونفضل ننميها ونكبرها لحد ما تبقى كبيره اوي مش عارفين نرويها صح....

انت جميل اوي بشخصيتك الحقيقيه واخلاقك ومبادئك ومستواك الاجتماعي الحقيقي اللي هيحبك هيختارك عشان انت كده مش حد تاني...واللي بيمثل غير حقيقته  هيجي وقت وهبطل تمثيل وهتظهر حقيقته...

 

عيش نفسك مهما كانت وتأكد انها الاحلى